O‘zbekiston AQShning yirik moliyaviy institutlari bilan hamkorlikni kengaytiradi
Shavkat Mirziyoyev AQSh Eksimbanki va DFC rahbarlari bilan uchrashuv o'tkazdi.
Toshkent xalqaro investitsiya forumi doirasida Shavkat Mirziyoyev AQSh Eksimbanki prezidenti va raisi Jon Yovanovich hamda Xalqaro moliyaviy taraqqiyot korporatsiyasi (DFC) bosh ijrochi direktori Ben Blek bilan uchrashuv o‘tkazdi.
Uchrashuv avvalida AQSh tomonining yuqori martabali vakillari davlat rahbariga Donald Trampning samimiy salomi va ezgu tilaklarini yetkazdi.
Muzokaralarda O‘zbekistonda infratuzilmani rivojlantirish, energetika, muhim minerallarni o‘zlashtirish, sun’iy intellektni joriy etish hamda raqamlashtirish kabi strategik yo‘nalishlardagi yirik loyihalarni moliyalashtirish masalalari muhokama qilindi.
AQSh Eksimbanki bilan hamkorlik doirasida energetika tarmog‘ini modernizatsiya qilish bo‘yicha qo‘shma loyihalarni jadallashtirish, shuningdek, mahalliy tadbirkorlar uchun eksport kreditlarini kengaytirish yuzasidan kelishuvga erishildi.
“DFC” korporatsiyasi bilan sog‘liqni saqlash, energetika va infratuzilma sohalarida investitsiya platformasini yo‘lga qo‘yish tashabbuslari qo‘llab-quvvatlandi.
Shuningdek, Toshkentda yangi xalqaro aeroport qurilishi, Farg‘onada zamonaviy tibbiyot majmuasi barpo etilishi, raqamli bank va data-markazlar tashkil etilishi kabi yirik loyihalarni amaliy bosqichga olib chiqish zarurligi ta’kidlandi.
Uchrashuv yakunida muhokama qilingan investitsiyaviy va texnologik loyihalar bo‘yicha qo‘shma “yo‘l xaritasi”ni ishlab chiqish va qabul qilishga kelishib olindi.
