Urugvay terma jamoasi AQShda itlar yordamida tekshiruvdan o‘tkazildi
Jahon chempionati ishtirokchilariga nisbatan kuchaytirilgan nazorat davom etmoqda
2026-yilgi FIFA Jahon chempionati doirasida AQShga yetib kelgan Urugvay terma jamoasi kuchaytirilgan xavfsizlik choralariga muvofiq tekshiruvdan o‘tkazildi.
Ijtimoiy tarmoqlarda tarqalgan videolarda futbolchilar va jamoa a’zolarining yuklari hamda jihozlari xizmat itlari yordamida ko‘zdan kechirilgani aks etgan. Xabarlarga ko‘ra, mazkur tekshiruv Saudiya Arabistoniga qarshi uchrashuv oldidan amalga oshirilgan.
Ma’lum qilinishicha, AQSh, Kanada va Meksikada o‘tkazilayotgan Jahon chempionati davomida xavfsizlik choralari sezilarli darajada kuchaytirilgan. Turnir ishtirokchilari, rasmiylar va muxlislar stadionlar hamda boshqa rasmiy obyektlarga kirishda bir necha bosqichli nazoratdan o‘tmoqda.
Urugvay terma jamoasi bilan bog‘liq tekshiruv ijtimoiy tarmoqlarda keng muhokamalarga sabab bo‘ldi. Ayrim muxlislar va ekspertlar bunday nazorat choralarini ortiqcha deb baholab, FIFA hamda AQSh rasmiylarini tanqid qilgan.
Ma'lumot uchun, Urugvay terma jamoasi Jahon chempionatidagi ilk uchrashuvida Saudiya Arabistoni bilan 1:1 hisobida durang o‘ynagan edi.
Eslatib o'tamiz, avvalroq AQSHga borgan O'zbekiston terma jamoasi ham kuchaytirilgan tartibda tekshiruvdan o'tkazilgani xabar qilingan edi.
