Bir kunda 281 ming muxlis: JCh-2026 rekord darajadagi tashrifni qayd etdi
Shimoliy Amerikada o‘tkazilgan guruh bosqichi o‘yinlarini bir kunning o‘zida 281 ming muxlis stadionlardan kuzatgan.
Xalqaro futbol assotsiatsiyalari federatsiyasi (FIFA) 16-iyun kuni 2026-yilgi futbol bo‘yicha Jahon chempionatida tarixiy tashrif rekordi qayd etilganini ma’lum qildi.
Tashkilotning ma’lumotlariga ko‘ra, Shimoliy Amerikada o‘tkazilgan guruh bosqichi o‘yinlarini bir kunning o‘zida 281 ming nafar tomoshabin stadionlardan turib kuzatgan. Bu Jahon chempionatlari tarixidagi eng yuqori bir kunlik tashrif ko‘rsatkichi sifatida qayd etilgan.
Rekord turnirning oltinchi kuni o‘tkazilgan uchrashuvlar vaqtida o‘rnatilgan. Jumladan, Kanzas-Sitida Argentina Jazoirni 3:0 hisobida mag‘lub etgan, Foksboroda Norvegiya Iroq ustidan 4:1 hisobida g‘alaba qozongan, Sharqiy Rezerfordda Fransiya Senegalni 3:1 hisobida taslim etgan, yana bir uchrashuvda Avstriya Iordaniyani 3:1 hisobida mag‘lubiyatga uchratgan.
FIFA rekord darajadagi tomoshabinlar sonini futbolning dunyo xalqlarini birlashtiruvchi kuchi bilan izohlab, muxlislarga stadionlardagi muhit va qo‘llab-quvvatlov uchun minnatdorlik bildirgan.
Shuningdek, tashkilot 11–15-iyun kunlari orasida o‘tkazilgan dastlabki besh kun davomida o‘yinlarga jami 1 milliondan ortiq muxlis tashrif buyurganini ma’lum qilgan edi. Shu bois, 1994-yilda AQSh mezbonlik qilgan mundialda o‘rnatilgan 3,59 million tomoshabinlik rekord yangilanishi mumkinligi qayd etilmoqda.
Ma’lumot uchun, 2026-yilgi Jahon chempionati tarixda ilk bor uch davlat — AQSh, Kanada va Meksika mezbonligida, 48 ta milliy terma jamoa ishtirokida o‘tkazilmoqda. Turnir 19-iyul kuni yakunlanadi.
