Zelenskiy Tramp va Makron bilan uchrashdi, Ukraina tinchlik muzokaralarini jonlantirishga urinmoqda
Uchrashuvdan so‘ng Zelenskiy G7 davlatlari Ukraina havo mudofaasi salohiyatini mustahkamlash bo‘yicha kelishuvga erishganini bildirdi.
Ukraina prezidenti Volodimir Zelenskiy G7 sammiti doirasida AQSH prezidenti Donald Tramp va Fransiya prezidenti Emmanuel Makron bilan uchrashdi. Bu Zelenskiy va Trampning so‘nggi to‘rt oy ichidagi ilk muloqoti bo‘ldi, deya yozmoqda The Kyiv Independent.
Manbalarga ko‘ra, qariyb 30 daqiqa davom etgan uchrashuvda Ukrainadagi urush, tinchlik muzokaralari istiqbollari hamda Kiyevning havo hujumidan mudofaa imkoniyatlarini kuchaytirish masalalari muhokama qilingan.
Zelenskiy Trampga Rossiya hujumlari oqibatida zarar ko‘rgan Kiyev-Pechersk Lavrasi suratlarini ko‘rsatgan. Shuningdek, Ukraina prezidenti AQSH bilan ballistik raketalarga qarshi mudofaa tizimlari va raketalarni ishlab chiqarish bo‘yicha hamkorlik masalasini ham ko‘targanini ma’lum qildi.
Uchrashuvdan so‘ng Zelenskiy G7 davlatlari Ukraina havo mudofaasi salohiyatini mustahkamlash bo‘yicha kelishuvga erishganini bildirdi. Tramp esa Rossiya urushni tugatish uchun kelishuvga erishishi kerakligini ta’kidladi.
Mazkur muloqot Ukraina Rossiya prezidenti Vladimir Putin bilan to‘g‘ridan-to‘g‘ri muzokaralarni yo‘lga qo‘yishga urinayotgan bir paytda bo‘lib o‘tdi. Zelenskiy avvalroq Tramp ko‘magida o‘zi va Putin ishtirokidagi uch tomonlama uchrashuv tashkil etilishiga umid bildirgan edi.
Biroq Kreml hozircha Zelenskiy bilan neytral hududda uchrashish takliflarini qo‘llab-quvvatlamayapti. Putin esa yaqinda Ukraina prezidenti bilan uchrashishdan ma’no ko‘rmasligini ma’lum qilgandi.
