AQSh BMT gumanitar dasturlariga 1 milliard dollardan ortiq mablag‘ ajratdi
Mablag‘larning asosiy qismi Jahon oziq-ovqat dasturiga, qolgtan qismi esa Bolalar jamg‘armasi hisobiga o‘tkaziladi.
AQSh hukumati Birlashgan Millatlar Tashkilotining gumanitar dasturlarini qo‘llab-quvvatlash maqsadida 1 milliard dollardan ortiq mablag‘ ajratdi. Bu haqda AQSh Davlat departamenti ma’lum qildi.
Ajratilgan mablag‘lar 40 dan ortiq mamlakatda urushlar, gumanitar inqirozlar va tabiiy ofatlardan jabr ko‘rgan aholiga yordam ko‘rsatish uchun yo‘naltiriladi. Mablag‘larning asosiy qismi — 800 million dollardan ortig‘i BMTning Jahon oziq-ovqat dasturiga (WFP), qariyb 218 million dollari esa Bolalar jamg‘armasi (UNICEF) hisobiga o‘tkaziladi.
Ta’kidlanishicha, yordam oluvchi davlatlar qatoridan Ukraina, Efiopiya va Myanma ham o‘rin olgan. Ajratilgan mablag‘lar oziq-ovqat xavfsizligini ta’minlash, sog‘liqni saqlash xizmatlarini qo‘llab-quvvatlash, bolalarni himoya qilish, logistika va boshqa gumanitar ehtiyojlarni qoplashga sarflanadi.
AQSh Davlat departamenti UNICEF va Jahon oziq-ovqat dasturi o‘z vakolatlari doirasida ushbu mablag‘lardan eng zarur yo‘nalishlarda foydalanishini bildirgan.
Qayd etilishicha, may oyida Vashington BMTning gumanitar tashabbuslarini moliyalashtirish uchun 1,8 milliard dollar ajratishini ma’lum qilgan, o‘tgan yil dekabrida esa yana 2 milliard dollarlik yordam e’lon qilingan edi.
Shu bilan birga, AQSh prezidenti Donald Tramp ma’muriyati xalqaro gumanitar dasturlar xarajatlarini qisqartirish siyosatini davom ettirmoqda. Tramp Oq uyga qaytganidan so‘ng qator xalqaro dasturlarni moliyalashtirishni to‘xtatgan va AQShning ayrim BMT tuzilmalari hamda xalqaro kelishuvlardagi ishtirokini qayta ko‘rib chiqish tashabbusini ilgari surgan.
Shunga qaramay, Qo‘shma Shtatlar BMTning eng yirik donorlaridan biri bo‘lib qolmoqda va global gumanitar inqirozlarga qarshi kurashda muhim moliyaviy ko‘mak ko‘rsatishda davom etmoqda.
