Futbolchilarimdan gʻururlanaman — Fabio Kannavaro
O‘zbekiston milliy terma jamoasi bosh murabbiyi Kolumbiyaga qarshi bo'lgan bahsni tarixiy o‘yin deb atadi.
Kolumbiyaga qarshi uchrashuvdan so‘ng tashkil etilgan matbuot anjumanida O‘zbekiston milliy terma jamoasi bosh murabbiyi Fabio Kannavaro bahs haqida o‘z fikrlari bilan o‘rtoqlashdi.
Italiyalik mutaxassis uchrashuv qiziqarli kechganini ta’kidlab, jamoa ikkinchi bo‘limda o‘yin sur’atini o‘zgartirishga muvaffaq bo‘lganini qayd etgan.
"O‘yin qiziqarli o‘tdi. Ikkinchi bo‘limda o‘yinni o‘zgartirishga erishdik. Ayniqsa, chap qanot orqali bir nechta imkoniyatlar yaratdik va o‘yin nazoratini o‘z qo‘limizga olishga harakat qildik", — degan Kannavaro.
"Biz avvalo O‘zbekistonni butun dunyoga ijobiy tomondan ko‘rsatish uchun bu yerga keldik. Futbolchilarimga doim o‘yin davomida faol harakat qilish kerakligini aytaman. Kolumbiya kabi kuchli jamoalarga qarshi, ayniqsa to‘psiz harakat qilish oson emas", — deya ta’kidlagan u.
Fabio Kannavaro ikkinchi bo‘limdagi o‘yinidan qoniqqanini, biroq o‘tkazib yuborilgan gol jamoa uchun achinarli bo‘lganini qayd etdi.
"Biz ushbu stadiondagi bahsni uzoq vaqt eslab qolamiz. Chunki bu tarixiy o‘yin. O‘zbekiston Jahon chempionatida ishtirok etmoqda. Umuman olganda, bugungi o‘yin biz uchun foydali tajriba bo‘ldi. Ayrim xatolar kuzatildi va biz ular ustida ishlaymiz", — degan bosh murabbiy.
Mutaxassis futbolchilarning harakatidan mamnunligini bildirib: "Futbolchilarimdan faxrlanaman. Ular yaxshi o‘yin namoyish etishdi. Bugun qiyin bahs bo‘ldi. Bunday stadion va minglab muxlislar qarshisida o‘ynash oson emas. Biroq aynan shunday muhit futbolchilarga qo‘shimcha motivatsiya ham beradi", — deya ta'kidladi Fabio Kannavaro.
