Robaxon Mahmudova Oliy sud raisi etib saylandi
Prezident tomonidan Robaxon Mahmudovani Oliy sud raisi lavozimiga saylash to‘g‘risida Senatga taqdimnoma kiritildi.
Prezident tomonidan Robaxon Anvarovna Mahmudovani O‘zbekiston Respublikasi Oliy sudi raisi lavozimiga saylash to‘g‘risidagi taqdimnoma Oliy Majlis Senatiga kiritildi.
Oliy Majlis Senati Kengashining majlisida Prezident tomonidan Oliy sud raisi lavozimiga kiritilgan nomzod ko‘rib chiqilib, Robaxon Anvarovna Mahmudovani sudyalik lavozimida bo‘lishning muddatsiz davriga va Oliy sud raisi lavozimiga besh yil muddatga saylash to‘g‘risidagi qaror qabul qilindi.
Ma’lumot o‘rnida, Robaxon Mahmudova Oliy Majlis Qonunchilik palatasidagi “Adolat” sotsial-demokratik partiyasi fraksiyasining rahbari. U 2023-yilgi prezidentlik saylovida “Adolat” partiyasidan nomzod sifatida ham ishtirok etgan.
Shuningdek, u avval O‘zbekiston Oliy sudi raisining birinchi o‘rinbosari — ma’muriy ishlar bo‘yicha sudlov hay’ati raisi, Jinoyat ishlari bo‘yicha Farg‘ona viloyati sudi raisi, Prezidentning Farg‘ona viloyatidagi Xalq qabulxonasi mudiri hamda Senatning Fan, ta’lim va sog‘liqni saqlash masalalari qo‘mitasi raisi lavozimlarida faoliyat yuritgan.
Bunga qadar Oliy sud raisi lavozimida ishlab kelgan Baxtiyor Islomovni lavozimdan ozod etish to‘g‘risida Oliy Majlis Senatiga prezident tomonidan taqdimnoma kiritilgandi. Yuqori palata uni lavozimdan olish to‘g‘risida qaror qabul qildi.
