Tramp Si Szinpin va Putindan Eron urushida betaraf qolgani uchun minnatdor bo‘ldi

AQSH prezidenti Donald Tramp Xitoy raisi Si Szinpin va Rossiya prezidenti Vladimir Putin Eron urushi davomida betaraf pozitsiyani saqlaganini aytib, ularga minnatdorchilik bildirdi. Bu haqda Reuters xabar berdi.

 

Trampning so‘zlariga ko‘ra, Pekin va Moskva vaziyatni murakkablashtirish imkoniyatiga ega bo‘lsa-da, bunday yo‘l tutmagan.

 

Tramp bu haqda Fransiyaning Evian-le-Ben shahrida o‘tkazilgan G7 sammiti yakunlari bo‘yicha matbuot anjumanida ma’lum qildi. U Eron mojarosi bo‘yicha erishilgan o‘t ochishni to‘xtatish kelishuvidan so‘ng Xitoy va Rossiya rahbarlarining harakatlarini ijobiy baholadi.

 

AQSH prezidenti Si Szinpin mojaroni hal etishga ko‘maklashganini ta’kidlab, Xitoy Eronga yirik qurol-yarog‘lar yoki yelkadan uchiriladigan zenit-raketa majmualarini yubormaganini qayd etdi. Trampning fikricha, Pekin va Moskva mojaroga faol aralashganida vaziyat yanada keskinlashishi mumkin edi.

 

Shu bilan birga, Tramp AQSHning ayrim ittifoqchilarini, jumladan Yaponiya va Yevropadagi hamkorlarini harbiy operatsiya hamda Hormuz bo‘g‘ozidagi harakatlarda yetarlicha yordam bermaganlik uchun tanqid qildi.

 

Qayd etilishicha, Rossiya va Xitoy Eron bilan yaqin aloqalarga ega. Moskva avvalroq urush Yaqin Sharqda yadroviy qurollanish poygasiga turtki berishi mumkinligi haqida ogohlantirgan. Pekin esa AQSHning Eronga qarshi hujumlarini mamlakat suverenitetining buzilishi sifatida baholagan.

 

Vashingtondagi Xitoy elchixonasi Trampning bayonotiga munosabat bildirar ekan, Pekinning pozitsiyasi o‘zgarmaganini va Xitoy mojaroni diplomatik yo‘l bilan hal etish hamda tinchlikni ta’minlash tarafdori ekanini ma’lum qildi. Rossiya elchixonasi esa Reuters so‘roviga darhol izoh bermagan.