O‘zini Bosh prokuratura xodimi sifatida tanishtirib, firibgarlik qilgan shaxs qamoqqa olindi

Bosh prokuratura Shaxsiy xavfsizlik boshqarmasi tomonidan o‘tkazilgan tezkor tadbirlar davomida fuqaro A.A. o‘zini prokuratura xodimi sifatida tanishtirib, bir necha shaxslarning mol-mulkini firibgarlik yo‘li bilan qo‘lga kiritgani aniqlandi. Bu haqda Bosh prokuratura xabar berdi.

 

Tergov ma’lumotlariga ko‘ra, u fuqarolar B.M. va S.Sh.ning ishonchiga kirib, arzon narxda bug‘doy mahsulotini sotib olish va uni qayta ishlash orqali yuqori daromad olish mumkinligini aytgan. Shu tariqa ulardan jami 1,7 milliard so‘m mablag‘ni firibgarlik yo‘li bilan olgan.

 

Shuningdek, A.A. jabrlanuvchi M.T.ga tegishli kompaniya uchun Toshkent shahridagi yer maydoni bo‘yicha bekor qilingan qarorni qayta tiklab berishni va’da qilib, evaziga 95 ming AQSH dollarini qo‘lga kiritgan.

 

Tergovda aniqlanishicha, u ijtimoiy tarmoq orqali tanishgan fuqaro I.N.ga ham prokuraturada ishlashini aytib, uning ishonchiga kirgan. Keyinchalik 2014-yilda ishlab chiqarilgan “Cobalt” avtomashinasini yangi “Gentra”ga almashtirib berishni va’da qilib, avtomashinani olgan hamda uni boshqa shaxsga sotib yuborgan.

 

Bundan tashqari, A.A. tanishi A.K.ning xonadon kaliti nusxasini qo‘lga kiritib, uning safarda bo‘lganidan foydalangan holda uyga noqonuniy kirgan va ko‘p miqdordagi tilla taqinchoqlarni o‘g‘irlab ketgani ma’lum qilindi.

 

2026-yil 18-iyun kuni unga nisbatan Jinoyat kodeksining firibgarlik, o‘g‘rilik hamda boshqa moddalari bilan ayblov e’lon qilinib, qamoq ehtiyot chorasi qo‘llanildi.

 

Bosh prokuratura mazkur shaxsning xatti-harakatlaridan jabrlangan yoki u haqda qo‘shimcha ma’lumotga ega bo‘lgan fuqarolarni 1161 raqamli ishonch telefoni orqali murojaat qilishga chaqirdi.