Portugaliya O‘zbekistonni yengishiga ishonmayman — Paulu Barbosa
Portugaliyalik futbol agenti Paulu Barbosa O‘zbekiston MTJ Kongo terma jamoasidan kuchliroq ekanini bildirdi.
Jahon chempionatining “K” guruhidan o‘rin olgan Kolumbiya, Portugaliya, Kongo Demokratik Respublikasi va O‘zbekiston milliy terma jamoalari ikkinchi tur uchrashuvlariga tayyorgarlik ko‘rmoqda.
Guruhning ilk turida Kolumbiya O‘zbekistonni 3:1 hisobida mag‘lub etgan bo‘lsa, Portugaliya kutilmaganda Kongo bilan 1:1 hisobida durang o‘ynadi.
Birinchi tur yakunlaridan so‘ng portugaliyalik futbol agenti Paulu Barbosa Portugaliyaning O‘zbekistonga qarshi bo‘ladigan uchrashuvi oldidan o‘z fikrlarini bildirdi.
Uning ta’kidlashicha, 41 yoshli Krishtinau Ronaldu uchun butun uchrashuv davomida maydonda harakat qilish qiyin bo‘lib qolmoqda. Barbosa Kongo bilan o‘yinda bu holat yaqqol ko‘ringanini aytib, Portugaliya bosh murabbiyi Roberto Martinezning Ronalduni asosiy tarkibda maydonga tushirish qarorini noto‘g‘ri deb baholadi.
Agentning fikricha, Ronaldu birinchi uchrashuvda kutilgan natijani ko‘rsata olmagani sababli O‘zbekistonga qarshi bahsni zaxira o‘rindig‘ida boshlashi mumkin.
Shuningdek, Barbosa Kongo bilan o‘yindan keyin Portugaliya terma jamoasining guruhdagi qolgan ikki uchrashuvdagi imkoniyatlariga ham shubha bilan qarayotganini bildirdi.
“Birinchi o‘yinga qarab baho beradigan bo‘lsam, Portugaliyaga ishonchim yo‘q. O‘zbekistonning Kolumbiyaga qarshi o‘yinini ham ko‘rdim. Menimcha, O‘zbekiston Kongodan kuchliroq. Kolumbiya haqida esa ortiqcha gapirishning hojati yo‘q”, — dedi u.
Eslatib o‘tamiz, O‘zbekiston va Portugaliya terma jamoalari o‘rtasidagi uchrashuv 23-iyun kuni AQSHning Hyuston shahridagi “Hyuston” stadionida bo‘lib o‘tadi. Bahs Toshkent vaqti bilan soat 22:00 da boshlanadi.
