Qozog'istonda bir xonali kvartirada qariyb 1000 migrant ro'yxatga olingan
Mazkur holat noqonuniy migratsiyani tashkil etish sifatida baholanib, kvartira egasi ozodlikni cheklash jazosiga hukm qilingan.
Qozog‘istonning Olmaota shahrida bir xonali kvartirada qariyb ming nafar shaxs noqonuniy ravishda ro‘yxatga qo‘yilgani fosh etildi. Bu haqda shahar prokuraturasi ma’lumotiga tayanib, Zakon.kz nashri xabar berdi.
Ma’lum qilinishicha, holat Olmaotaning Naurizbay tumanida prokuratura tomonidan o‘tkazilgan tekshiruv davomida aniqlangan. Aniqlanishicha, kvartira egasi aslida ushbu manzilda yashamaydigan 990 nafar fuqaroni pul evaziga bir xonali uyda ro‘yxatdan o‘tkazgan.
Mazkur harakat noqonuniy migratsiyani tashkil etish sifatida baholanib, unga nisbatan Qozog‘iston Jinoyat kodeksining 394-moddasi bo‘yicha jinoyat ishi qo‘zg‘atilgan.
Sud qarori bilan kvartira egasi aybdor deb topilib, bir yil muddatga ozodlikni cheklash jazosiga hukm qilindi.
Prokuratura ma’lumotlariga ko‘ra, noqonuniy ro‘yxatdan o‘tkazilgan shaxslarning qaysi davlat fuqarolari ekani ochiqlanmagan.
