Abbosbek Fayzullayev JCH 1-turida biryo‘la ikki rekord qayd etdi
Fayzullayev turnirning birinchi turidagi eng tezkor va XXI asrdagi JChda bosh bilan gol urgan eng past bo‘yli futbolchi bo‘ldi.
O‘zbekiston milliy terma jamoasi yarimhimoyachisi Abbosbek Fayzullayev 2026 yilgi Jahon chempionatining 1-turida ikki muhim rekord muallifiga aylandi.
SofaScore platformasi ma’lumotiga ko‘ra, 22 yoshli futbolchi Kolumbiyaga qarshi uchrashuvda soatiga 36 km tezlikka chiqib, turnirning 1-turidagi eng tezkor futbolchi sifatida qayd etildi. Bu ko‘rsatkich barcha o‘yinchilar orasida eng yuqori natija bo‘ldi.
Ikkinchi o‘rinni Xorvatiya terma jamoasi vakili Yosip Stanisich egallagan bo‘lib, uning maksimal tezligi 35,9 km/soatni tashkil etdi. Kuchli uchlikni esa Kot-d’Ivuardan Vilfrid Singo 35,8 km/soat bilan yakunladi.
Shuningdek, Abbosbek Fayzullayev Jahon chempionatlari tarixida XXI asrda bosh bilan gol urgan eng past bo‘yli futbolchi sifatida ham rekord o‘rnatdi.
Opta statistikasiga ko‘ra, 167 sm bo‘yga ega futbolchi avvalgi rekordchi urugvaylik Giorgian de Arrascaetani ortda qoldirdi. De Arrascaeta 2022 yilgi Jahon chempionatida 173 sm bo‘y bilan Gana darvozasiga bosh bilan gol urgan.
