Bekobodda ayolni o‘ldirib, jasadini hovliga ko‘mgan erkak 15 yildan ortiqqa qamaldi
Fojia ijtimoiy tarmoq orqali tanishgan erkak va ayol o‘rtasidagi navbatdagi janjaldan so‘ng yuz bergan. Marhumaning jasadi esa oradan qariyb bir oy o‘tib topilgan.
Toshkent viloyati jinoyat ishlari bo‘yicha Bekobod shahar sudida ayolni o‘ldirib, jasadini yashirishga uringan erkakka nisbatan hukm chiqarildi. Bu haqda “Zamon” informatsion dasturida ma’lum qilindi.
Sud materiallariga ko‘ra, 27 yoshli erkak Instagram orqali turmushidan ajrashgan ayol bilan tanishgan. Bir muddat yozishib yurgan tomonlar keyinchalik uchrashib, ayol voyaga yetmagan o‘g‘li bilan erkakning uyida yashay boshlagan.
Biroq ular o‘rtasidagi munosabatlar uzoq davom etmagan. Sudlanuvchining ko‘rsatmasiga ko‘ra, ayol spirtli ichimliklar va psixotrop vositalarni iste’mol qilgani sababli ular o‘rtasida tez-tez kelishmovchiliklar yuzaga kelgan.
2025-yil 2-dekabrdan 3-dekabrga o‘tar kechasi navbatdagi janjal vaqtida erkak ayoldan uyini tark etishni talab qilgan. Sudlanuvchining aytishicha, ayol bunga qarshilik ko‘rsatgan va mojaro vaqtida yiqilib, bosh qismidan og‘ir jarohat olgan.
Oqibatda ayol voqea joyida vafot etgan. Shundan so‘ng erkak jinoyat izlarini yashirish maqsadida jasadni uyining orqa hovlisiga ko‘mgan. Shuningdek, qon izlari tushgan kiyimlar hamda marhumaning SIM-kartalarini yo‘q qilgan.
Huquqni muhofaza qiluvchi organlar xodimlari 2025-yil 27-dekabr kuni marhumaning jasadini aniqlab, qazib olgan.
Sud hukmiga ko‘ra, erkak aybdor deb topilib, 15 yil 6 oy muddatga ozodlikdan mahrum etildi.
