O‘zbekiston – Portugaliya uchrashuvini marokashlik hakamlar boshqaradi
Bahsning to‘rtinchi va beshinchi rasmiy hakamlari sifatida JAR vakillari faoliyat olib boradi.
AQSH, Kanada va Meksikada bo‘lib o‘tayotgan Jahon chempionatining “K” guruhi 2-turidan o‘rin olgan Portugaliya va O‘zbekiston milliy terma jamoalari o‘rtasidagi bahsni boshqaradigan rasmiylar tarkibi ma’lum qilindi.
Uchrashuvni FIFA referesi, marokashlik Jalal Jayed boshqarib boradi. Unga qanotlarda hamyurtlari Zakariya Brinsi va Mustafo Akarkad yordam beradi. Bahsning to‘rtinchi va beshinchi rasmiy hakamlari sifatida Janubiy Afrika Respublikasi vakillari Abongayl Tom hamda Zaxele Sivela faoliyat olib boradi.
Eslatib o‘tamiz, O‘zbekiston va Portugaliya o‘rtasidagi uchrashuv 23-iyun kuni Toshkent vaqti bilan soat 22:00 da start oladi.
