O‘zbekistonda eski avtomobillarni utilizatsiyaga topshirmaganlar jarima to‘laydi
Ishlab chiqarilganiga 30 yil va undan ortiq vaqt bo‘lgan avtomobillar egalaridan bozor narxida xarid qilinib, utilizatsiyaga yuboriladi.
O‘zbekistonda ekspluatatsiya muddati o‘tgan avtotransport vositalarini utilizatsiya qilish tizimini bosqichma-bosqich joriy etish rejalashtirilmoqda. Bu haqda Chiqindilarni boshqarish agentligi xabar qildi.
Ma’lum qilinishicha, ishlab chiqarilganiga 30 yil va undan ortiq vaqt bo‘lgan avtomobillar egalaridan bozor narxida xarid qilinib, utilizatsiyaga yuboriladi.
Tashabbus atmosfera havosining ifloslanishini kamaytirish, ekologik barqarorlikni ta’minlash va transport vositalaridan chiqayotgan zararli moddalar hajmini qisqartirish maqsadida ishlab chiqilgan.
Loyihaga ko‘ra, eski avtomobilini utilizatsiyaga topshirgan fuqarolarga yangi avtomobil xaridi uchun elektron vaucher berilishi yoki uning qiymati pul shaklida to‘lab berilishi mumkin. Elektron vaucher orqali O‘zbekistonda ishlab chiqarilgan yangi avtomobillarni imtiyozli shartlarda xarid qilish imkoniyati yaratiladi.
Shuningdek, elektron vaucherda ko‘rsatilgan summa miqdorida chegirma qo‘llanadi, qolgan mablag‘ esa bir yildan ortiq muddatga bo‘lib-bo‘lib to‘lanishi mumkin.
Loyihada eski avtomobillarni o‘z vaqtida utilizatsiyaga topshirmagan fuqarolar uchun ham ekologik kompensatsiya joriy etish nazarda tutilgan. Unga ko‘ra, bunday transport vositalari egalari yiliga bir marta bazaviy hisoblash miqdorining 30 baravari miqdorida to‘lov amalga oshirishi kerak bo‘ladi.
Qayd etilishicha, utilizatsiya tizimi Fransiya, Germaniya, Buyuk Britaniya, AQSH, Yaponiya va boshqa qator davlatlarda keng qo‘llanadi.
