Pokistondagi ketma-ket portlashlarda kamida yetti kishi halok bo‘ldi

 

Pokistonning shimoli-g‘arbidagi Xayber Paxtunxva viloyatida sodir bo‘lgan ketma-ket portlashlar oqibatida kamida yetti kishi halok bo‘ldi. Bu haqda Al Arabiya telekanali mahalliy huquq-tartibot organlariga tayanib xabar berdi.

 

Ma’lumotlarga ko‘ra, dastlabki portlash yo‘l chetiga o‘rnatilgan va masofadan boshqariladigan qo‘lbola portlovchi qurilma xususiy pikap avtomobilini nishonga olishi oqibatida yuz bergan.

 

Oradan ko‘p o‘tmay, jabrlanganlar shoshilinch ravishda tibbiyot muassasasiga olib ketilayotgan paytda ikkinchi portlash sodir bo‘lgan. Natijada qurbonlar soni kamida yetti kishiga yetgani ma’lum qilingan.

 

Hozircha hujumlar uchun javobgarlikni hech bir guruh o‘z zimmasiga olmagan. Shu bilan birga, Al Arabiya nashri hududda faoliyat yuritayotgan “Tehrik-e Tolibon Pokiston” (TTP) guruhi mavjudligini eslatib o‘tgan.

 

Nashrning qayd etishicha, Pokiston hukumati mamlakatdagi terrorchilik hujumlari sonining ortishini qo‘shni Afg‘oniston hududida faoliyat yuritayotgan qurolli guruhlar bilan bog‘lamoqda. Kobul rasmiylari esa bu ayblovlarni rad etib kelmoqda.

 

So‘nggi oylarda ikki davlat o‘rtasidagi munosabatlar keskinlashib, chegara hududlarida qurolli to‘qnashuvlar va Pokiston tomonidan Afg‘oniston hududiga uyushtirilgan havo hujumlari qayd etilgan.