“O‘zbekiston Portugaliyadan qo‘rqmaydi” — Fabio Kannavaro

 

O‘zbekiston milliy terma jamoasi bosh murabbiyi Fabio Kannavaro Portugaliyaga qarshi bo‘ladigan uchrashuv oldidan jamoaning tayyorgarligi, Kolumbiyaga qarshi o‘yindan chiqarilgan xulosalar hamda turnirdagi maqsadlari haqida fikr bildirdi.

 

Italiyalik mutaxassis murabbiylik futbolchilikdan tubdan farq qilishini ta’kidlab, maydon tashqarisida turib futbolchilarga yordam berish istagi va natija uchun javobgarlik katta bosim yuklashini qayd etdi.

 

Kannavaro Kolumbiyaga qarshi uchrashuvdan asosiy xulosa sifatida yuqori darajadagi bahslarda kichik xatolar ham qimmatga tushishini aytdi. Uning ta’kidlashicha, jamoa intizomli va agressiv o‘yin namoyish qilgan bo‘lsa-da, ayrim vaziyatlardagi e’tiborsizlik gol o‘tkazib yuborishga sabab bo‘lgan.

 

Shu bilan birga, mutaxassis ikkinchi bo‘limdagi o‘yindan mamnun ekanini bildirib, futbolchilarga doimo o‘z uslubidan voz kechmaslik, to‘p nazoratidan qo‘rqmaslik va futbol zavqini his qilish kerakligini uqtirib kelayotganini ta’kidladi.

 

Portugaliya bilan bo‘ladigan uchrashuv haqida gapirar ekan, Kannavaro raqib tarkibi yulduz futbolchilarga boy ekanini, ayniqsa Krishtianu Ronalduning so‘nggi yigirma yilning eng buyuk futbolchilaridan biri ekanini qayd etdi. Shunga qaramay, u maydonda nomlar emas, jamoaviy o‘yin hal qiluvchi omil bo‘lishini aytdi.

 

“Portugaliya juda kuchli jamoa. Biroq har bir jamoaning kuchli va zaif tomonlari bo‘ladi. Biz ularning kuchli jihatlarini cheklash va zaif nuqtalaridan foydalanishga harakat qilamiz”, — dedi murabbiy.

 

Fabio Kannavaro turnir yakunida O‘zbekiston jamoasi jahon chempionatida debyut qilgan bo‘lsa-da, kuchli raqiblardan cho‘chimaydigan, intizomli va yaxshi tashkil etilgan jamoa sifatida esda qolishini istashini ta’kidladi.

 

Shuningdek, italiyalik mutaxassis murabbiylik bolalikdagi orzusi bo‘lmaganini, biroq hozir o‘z tajribasini futbolchilar bilan baham ko‘rish va har kuni yangi narsalarni o‘rganish unga katta zavq bag‘ishlashini qayd etdi.