“Biz qaramlikdan xalos bo‘lishimiz kerak” — Netanyaxu
Bosh vazir Isroil o‘zining mustaqil qurol ishlab chiqarish tizimini yaratishi kerakligini ta’kidladi.
Isroil Bosh vaziri Binyamin Netanyaxu mamlakat mudofaa sanoatini mustaqil rivojlantirish va qurol-yarog‘ masalasida AQShga qaramlikni kamaytirish zarurligini ma’lum qildi deb xabar berdi TASS.
G‘arbiy Sohilda kursantlar bilan uchrashuv chog‘ida so‘zga chiqqan hukumat rahbari amerikalik hamkorlarning ko‘magini yuqori baholashini ta’kidlarkan, Isroil o‘zining mustaqil qurol ishlab chiqarish tizimini shakllantirishi lozimligini qayd etgan.
“Amerikalik do‘stlarimizning qo‘llab-quvvatlashini chuqur qadrlayman, biroq biz qaramlikdan xalos bo‘lishimiz va o‘zimizning mustaqil qurol ishlab chiqarish tizimimizni yaratishimiz kerak. O‘z qurollarimizni ishlab chiqarishimiz zarur”, — degan Netanyaxu.
Bosh vazirning ta’kidlashicha, Isroil hozirda Eron va uning mintaqadagi ittifoqchilari bilan qarama-qarshilik sharoitida bo‘lib, mamlakatning kelajakdagi xavfsizligi va salohiyati o‘z kuchiga tayanish darajasiga bog‘liq.
Netanyaxu 3-may kuni Isroil mudofaa sanoatini rivojlantirish maqsadida keyingi o‘n yil ichida mudofaa byudjetini 350 milliard shekelga, ya’ni qariyb 115 milliard dollarga oshirish rejalashtirilayotganini ham eslatib o‘tgan.
