Endi firibgarlik va talon-toroj uchun zarar qoplanmasa, shartli ozodlik qo‘llanilmaydi
O‘zbekistonda korrupsiyaga oid jinoyatlarning aniq ro‘yxati tasdiqlandi.
O‘zbekiston Respublikasining 2026-yil 22-iyundagi O‘RQ–1155-son Qonuni bilan ayrim qonun hujjatlariga qo‘shimcha va o‘zgartirishlar kiritildi hamda korrupsiyaga oid jinoyatlarning aniq ro‘yxati belgilandi. Bu haqda Adliya vazirligi xabar berdi.
Jinoyat kodeksiga kiritilgan qo‘shimchalarga ko‘ra, 167-modda 3-qismi “d” bandi, 168-modda 4-qismi “g” bandi, 192-9, 192-10-moddalari, 192-11-modda 2-qismi “v” bandi, 205-modda 2-qismi “v” bandi, 206-modda 2-qismi “v” bandi, 208-modda 2-qismi, 209-modda 2-qismi “v” bandi, shuningdek, 210, 211, 212, 213, 214, 214-1, 214-2-moddalari hamda 301-modda 2-qismi “b” bandida nazarda tutilgan jinoyatlar korrupsiyaga oid jinoyatlar sifatida belgilandi.
Bundan tashqari, Jinoyat kodeksining 243-moddasida nazarda tutilgan jinoiy faoliyatdan olingan daromadlarni legallashtirish bilan bog‘liq qilmishlar, agar ular korrupsiyaga oid jinoyatlar natijasida olingan mablag‘lar bilan bog‘liq bo‘lsa, korrupsiyaga oid jinoyatlar toifasiga kiritiladi.
Qonunga muvofiq, o‘zlashtirish yoki rastrata yo‘li bilan talon-toroj qilish hamda firibgarlik uchun hukm qilingan va sodir etgan jinoyati oqibatida yetkazilgan zararni to‘liq qoplamagan shaxslarga nisbatan jazodan muddatidan ilgari shartli ravishda ozod qilish tartibi qo‘llanilmaydi.
Shuningdek, Ma’muriy javobgarlik to‘g‘risidagi kodeksga kiritilgan o‘zgartirishlarga ko‘ra, davlat xaridlari predmetining boshlang‘ich narxi bilan uning o‘rtacha bozor narxi o‘rtasidagi yo‘l qo‘yiladigan eng yuqori tafovutga oid talablarni buzgan mansabdor shaxslarga bazaviy hisoblash miqdorining 30 baravarigacha miqdorda jarima qo‘llanilishi belgilandi.
Bundan tashqari, “Korrupsiyaga qarshi kurashish to‘g‘risida”gi Qonunga kiritilgan qo‘shimchalarga asosan Qoraqalpog‘iston Respublikasi, viloyatlar va Toshkent shahrida korrupsiyaga qarshi kurashish bo‘yicha hududiy kengashlar tashkil etiladi. Davlat organlari va tashkilotlarida esa komplaens va korrupsiyaga qarshi ichki nazorat tuzilmalari faoliyati yo‘lga qo‘yiladi.
Mazkur qonun rasmiy e’lon qilingan kundan e’tiboran kuchga kiradi.
