Fransiyada jazirama oqibatida 18 kishi halok bo‘ldi
Mamlakatning ayrim hududlarida havo harorati 40 darajadan oshdi.
Fransiyada kuzatilayotgan rekord darajadagi issiq to‘lqini oqibatida so‘nggi ikki kun ichida kamida 18 kishi vafot etdi. Bu haqda Reuters agentligi xabar berdi.
Ma’lumotlarga ko‘ra, 22-iyun kuni mamlakatning ayrim hududlarida havo harorati 40 darajadan oshgan. Halok bo‘lganlar orasida yopiq avtomobil ichida hushidan ketgan ikki va to‘rt yoshli ikki nafar bola ham bor. Shuningdek, 80 yoshdan 95 yoshgacha bo‘lgan uch kishi issiq urishi oqibatida hayotdan ko‘z yumgan.
Yana 13 kishi jazirama tufayli xavfli hududlarda cho‘milish vaqtida cho‘kib ketgan.
Bordo mintaqasida havo harorati 41,9 darajaga yetib, o‘tgan yil avgust oyida qayd etilgan rekord yangilangan. Puatye shahrida esa termometrlar 41,2 darajani ko‘rsatib, 1947-yildan buyon kuzatilgan eng yuqori ko‘rsatkich qayd etilgan.
Shu bilan birga, Yevropaning boshqa davlatlarida ham yangi harorat rekordlari qayd etilmoqda. Ispaniyaning San-Sebastyan shahrida havo harorati 40 darajaga yetgan. Buyuk Britaniya Meteorologiya xizmati esa mamlakatning ayrim hududlarida hafta oxiriga qadar harorat 39 darajadan oshishi mumkinligi haqida ogohlantirgan.
Mutaxassislar Yevropaning qator hududlarida anomal issiq ob-havo saqlanib qolishini prognoz qilmoqda.
