Fransiyada jaziramadan saqlanishga uringan 40 kishi cho‘kib halok bo‘ldi

Fransiyada davom etayotgan kuchli issiqlik to‘lqini oqibatida 18-iyundan buyon kamida 40 kishi cho‘kib halok bo‘ldi. Bu haqda mamlakat bosh vaziri Sebastyen Lekornyuga tayanib, Al Arabiya xabar berdi.

 

Qayd etilishicha, jaziramadan salqinlashish maqsadida ko‘plab fuqarolar nazorat qilinmaydigan daryo, kanal va boshqa suv havzalarida cho‘milishga uringan. Natijada bir necha kun ichida o‘nlab cho‘kish holatlari qayd etilgan. 

 

Fransiya meteorologiya xizmati mamlakatning katta qismida yuqori darajadagi issiqlik xavfi e’lon qilinganini bildirib, ayrim hududlarda havo harorati 43 darajagacha ko‘tarilishi mumkinligini ma’lum qildi. Jazirama tufayli mamlakatda kundalik hayot ham izdan chiqmoqda. 

 

Parij va Bryussel o‘rtasidagi ayrim poyezd qatnovlari bekor qilingan, korxonalar esa xodimlarni issiqdan himoya qilish choralarini kuchaytirgan. Ayrim hududlarda elektr ventilyatorlariga talab keskin oshib, do‘konlarda ular tugab qolgan. 

 

Fransiyaning janubi-sharqidagi Karpantra shahrida esa avtomobil ichida hushsiz holda topilgan ikki nafar bola hayotdan ko‘z yumdi. Mahalliy prokuratura hodisani kuchli issiqlik bilan bog‘liq fojia sifatida baholamoqda. Jazirama Yevropaning boshqa mamlakatlariga ham ta’sir ko‘rsatmoqda. 

 

Italiyada 15 shahar uchun eng yuqori darajadagi issiqlik ogohlantirishi e’lon qilingan. Buyuk Britaniyada havo harorati 37 darajagacha ko‘tarilishi kutilmoqda, Ispaniyaning ayrim hududlarida esa 44 daraja issiq prognoz qilinmoqda.