Kongoda noma’lum kasallikdan 14 kishi vafot etdi
Kasallik alomatlari paydo bo‘lgach, o‘lim 24 soat ichida qayd etilmoqda.
Kongo Demokratik Respublikasining g‘arbiy qismida kelib chiqishi noma’lum bo‘lgan kasallik 19 kun ichida 14 kishining hayotiga zomin bo‘ldi. Bu haqda mahalliy deputat Jak Ilungu Openi ma’lum qildi.
Ma’lumotlarga ko‘ra, Kvilu provinsiyasidagi Mokolo-Biala qishlog‘ida iyun oyining boshidan buyon noma’lum kasallik holatlari qayd etilib, hudud aholisi orasida xavotirli vaziyat yuzaga kelgan.
Deputatning ta’kidlashicha, qishloqda kasallik tez tarqalayotgani sababli aholi soni kamayib bormoqda. U markaziy hukumat va sog‘liqni saqlash organlarini zudlik bilan vaziyatga aralashishga va kasallikning tabiatini aniqlashga chaqirgan.
Kasallik belgilari sifatida kuchli bosh og‘rig‘i, qorin va tizza og‘rig‘i hamda qayt qilish holatlari qayd etilgan. Bemorlar kasallik juda tez rivojlanishini, o‘lim esa dastlabki alomatlardan so‘ng 24 soat ichida yuz berayotganini bildirishgan.
Hozirda mahalliy mutaxassislar tomonidan namunalar to‘planib, laboratoriya sharoitida tekshiruv ishlari olib borilmoqda.
