Farg‘ona va Jizzaxda elektr ta’minoti korxonalari muhandislari pora bilan ushlandi
Ular elektr tarmog‘iga ulash va qarzdorlikni bartaraf etib berish evaziga yirik miqdorda pul talab qilgan.
Farg‘ona va Jizzax viloyatlarida elektr ta’minoti korxonalari muhandislari tomonidan sodir etilgan korrupsion holatlar Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirlar davomida fosh etildi. Bu haqda DXX Zamon.uz'ga xabar berdi.
Aniqlanishicha, Farg‘ona tumani elektr ta’minoti korxonasi muhandisi xizmat mavqeidan foydalanib, fuqaroning qurilish mahsulotlari ishlab chiqarish sexiga elektr tarmog‘i tortish, hisoblagich o‘rnatish va ulab berish, shuningdek, mansabdor tanishlari orqali ruxsat beruvchi hujjatlarni tayyorlatib berish evaziga 100 million so‘m talab qilgan. Tezkor tadbir davomida muqaddam sudlangan ushbu shaxs so‘ralgan pul mablag‘ini olayotgan vaqtida ashyoviy dalillar bilan qo‘lga olingan.
Shuningdek, Sh. Rashidov tumani elektr ta’minoti korxonasi muhandisi mahalliy fermer xo‘jaligining elektr energiyasi bo‘yicha mavjud 122 million so‘mlik qarzdorligini mansabdor tanishlari orqali bartaraf etib berish evaziga 50 million so‘m talab qilgani aniqlangan. U avval 10 million so‘mni olgan bo‘lib, DXX va IJQKD xodimlari tomonidan o‘tkazilgan tezkor tadbirda qolgan 40 million so‘mni olayotgan vaqtida ushlangan.
Hozirda har ikki holat yuzasidan tegishli moddalar bilan jinoyat ishlari qo‘zg‘atilib, tergov harakatlari olib borilmoqda.
