Farg‘onada 18 yoshli qizni Turkiyaga sotmoqchi bo'lgan shaxslar ushlandi
Jinoiy guruh qizni ish va yaxshi daromad va’dasi bilan xorijga ketishga ko‘ndirgan.
Farg‘ona viloyatida odam savdosiga aloqador jinoiy guruh faoliyati fosh etildi. Bu haqda IIV matbuot xizmati xabar berdi.
Aniqlanishicha, Quva tumanida yashab, hozirda Turkiyaning Denizli shahrida istiqomat qilayotgan ayol Farg‘ona shahrida yashovchi sherigi bilan oldindan til biriktirib, yosh qizlarni xorijda yuqori daromadli ish va’dasi bilan aldab, Turkiyaga yuborish bilan shug‘ullanib kelgan.
Jinoiy guruhning navbatdagi nishoni Farg‘ona shahrida yashovchi, 2008-yilda tug‘ilgan qiz bo‘lgan. Ular qizni Turkiyada oson ish topish va yaxshi daromad olish imkoniyati borligiga ishontirib, xorijga ketishga ko‘ndirgan. Biroq ichki ishlar organlari tomonidan o‘tkazilgan tezkor tadbir natijasida ularning noqonuniy rejasi o‘z vaqtida fosh etilgan.
Mazkur holat yuzasidan O‘zbekiston Respublikasi Jinoyat kodeksining 135-moddasi (odam savdosi) bilan jinoyat ishi qo‘zg‘atilib, tergov harakatlari olib borilmoqda.
Mutasaddilar fuqarolarni xorijda ish taklif qilayotgan shaxslarning va’dalariga ishonishda ehtiyotkor bo‘lishga, ularning faoliyati qonuniyligini tekshirishga hamda shubhali holatlar yuzasidan huquqni muhofaza qiluvchi organlarga murojaat qilishga chaqirmoqda.
