Venesueladagi kuchli zilzilalar oqibatida 32 kishi halok bo'ldi
700 nafardan ortiq fuqaro turli darajadagi tan jarohatlari olgan.
Venesuelada 24-iyun kuni sodir bo‘lgan ikki kuchli zilzila oqibatida kamida 32 kishi halok bo‘gan, 700 nafardan ortiq fuqaro turli darajadagi tan jarohatlari olgan. Bu haqda Forbes nashri xabar berdi.
Ma’lum qilinishicha, magnitudasi 7,2 va 7,5 ga teng bo‘lgan yer silkinishlari mamlakat poytaxti Karakasdan taxminan 160 kilometr g‘arbda qayd etilgan. Kuchli zilzilalar natijasida bir qator hududlarda binolar qulab tushgan, infratuzilmaga jiddiy zarar yetgan.
Venesuela muvaqqat prezidenti Delsi Rodriges milliy televideniye orqali qilgan murojaatida hodisani “chinakam fojia” deb baholab, qutqaruv xizmatlari vayronalar ostida qolgan fuqarolarni qidirish va ularni xavfsiz hududlarga evakuatsiya qilish bo‘yicha uzluksiz ish olib borayotganini ma’lum qilgan.
AQSh Geologik xizmati (USGS) zilzila yuzasidan qizil xavf darajasini e’lon qilgan. Tashkilotning PAGER avtomatlashtirilgan monitoring tizimi dastlabki hisob-kitoblariga ko‘ra, tabiiy ofat oqibatlari yanada og‘ir bo‘lishi va qurbonlar soni ancha yuqori bo‘lish ehtimoli mavjud bo‘lgan.
Shuningdek, mutaxassislar zilzilalar oqibatida yuzaga kelgan iqtisodiy zarar mamlakat iqtisodiyotiga sezilarli ta’sir ko‘rsatishi mumkinligini qayd etmoqda.
Ayni paytda zarar ko‘lami va qurbonlar soniga oid ma’lumotlarga aniqlik kiritish ishlari davom etmoqda.
