Qirg‘izistonda o‘zbekistonlik ayol daryoda cho‘kib, halok bo'ldi
Ichida 4 kishi bo‘lgan avtomobil daryoga tushib ketgan. 3 nafar erkak omon qolgan. Ayol oqib ketgan.
Qirg‘izistonning To‘xtag‘ul tumanida avtomobil Chichqon daryosiga qulab tushishi oqibatida O‘zbekiston fuqarosi halok bo‘ldi. Bu haqda mamlakat Favqulodda vaziyatlar vazirligiga tayanib, Sputnik Kyrgyzstan xabar berdi.
Ma’lum qilinishicha, hodisa 22-iyun kuni sodir bo‘lgan. Avtomobilda to‘rt kishi — uch nafar erkak va 45 yoshli ayol bo‘lgan.
Hodisa oqibatida erkaklar o‘z kuchi bilan avtomobildan chiqishga muvaffaq bo‘lgan. Biroq ayolni daryo oqimi oqizib ketgan.
Qidiruv-qutqaruv ishlari natijasida oradan to‘rt kun o‘tib qutqaruvchilar uning jasadini topdi va huquqni muhofaza qiluvchi organlar xodimlariga topshirdi.
Marhumaning O‘zbekiston fuqarosi ekani ma’lum qilingan. Hodisa yuzasidan tegishli tartibda surishtiruv ishlari olib borilmoqda.
