Venesuelada kuchli zilzila qurbonlar soni 235 kishiga yetdi

 

Venesuelada sodir bo‘lgan kuchli zilzilalar oqibatida qurbonlar soni 235 kishiga yetdi, 4300 dan ortiq kishi turli darajadagi tan jarohati olgan. Bu haqda mamlakat sog‘liqni saqlash vaziri Karlos Alvarado ma’lum qildi.

 

Rasmiy ma’lumotlarga ko‘ra, eng og‘ir vaziyat La Guayra shtatida kuzatilmoqda. Hududda eng ko‘p qurbonlar va jabrlanganlar qayd etilgan bo‘lib, qutqaruv va tibbiy yordam ishlari kuchaytirilgan tartibda davom ettirilmoqda. Ayni paytda qurolli kuchlar, Venesuela Qizil Xochi hamda xususiy tibbiyot muassasalari tomonidan tashkil etilgan dala gospitalari faoliyat yuritmoqda.

 

Vazirning aytishicha, zilziladan so‘ng darhol mamlakat bo‘ylab favqulodda vaziyatlarga javob berish tizimi ishga tushirilgan. Eng ko‘p zarar ko‘rgan hududlarga 5 mingdan ortiq tibbiyot xodimi, jumladan 1200 dan ortiq shifokor yuborilgan.

 

Zilzila Venesuela qirg‘oqlari yaqinida sodir bo‘lgan. Ketma-ket qayd etilgan ikki yer silkinishining magnitudasi mos ravishda 7,2 va 7,5 ballni tashkil etgan. Ularning epitsentri Moron shahridan 16 kilometr va San Felipe shahridan 24 kilometr uzoqlikda joylashgan.

 

Dastlabki hisob-kitoblarga ko‘ra, 8 ta kasalxona, 20 ta savdo markazi va 68 ta infratuzilma obyekti zarar ko‘rgan. Shuningdek, 250 ta bino shikastlangan yoki butunlay vayron bo‘lgan. Ayrim tibbiyot muassasalari xavfsizlik nuqtai nazaridan evakuatsiya qilingan.

 

The New York Times nashrining yozishicha, ushbu zilzila Venesuelada so‘nggi 126 yil ichidagi eng kuchli yer silkinishi bo‘lishi mumkin.