Venesuelada zilzila ortidan vayronalar orasida chaqaloq tug‘ildi
Tug‘ruq elektr energiyasi va zarur tibbiy jihozlar bo‘lmagan sharoitda amalga oshirilgan.
Venesuelada yuz bergan kuchli zilzilalar oqibatida qulab tushgan bino vayronalari orasida qolgan ayol ko‘ngillilar yordami bilan chaqaloqni dunyoga keltirdi. Bu haqda El Mundo nashri xabar berdi.
Ma’lum qilinishicha, tug‘ruq elektr energiyasi va zarur tibbiy jihozlar bo‘lmagan sharoitda amalga oshirilgan. Ko‘ngillilar ayolga birlamchi yordam ko‘rsatib, ona va chaqaloqning hayotini saqlab qolishga muvaffaq bo‘lgan.
Eslatib o‘tamiz, 24-iyun kuni Venesuelada qisqa vaqt oralig‘ida magnitudasi 7,2 va 7,5 bo‘lgan ikkita kuchli zilzila sodir bo‘ldi. Shundan so‘ng yana 30 ga yaqin takroriy yer silkinishlari qayd etilgan.
So‘nggi rasmiy ma’lumotlarga ko‘ra, tabiiy ofat oqibatida 235 kishi halok bo‘lgan, 4300 nafardan ortiq jabrlanuvchiga tibbiy yordam ko‘rsatilgan. O‘nlab turar joy binolari vayron bo‘lgan, infratuzilma va tibbiyot muassasalari jiddiy zarar ko‘rgan. Mamlakatda favqulodda holat e’lon qilinib, La Guaira shtati falokat hududi deb e’lon qilingan.
Shuningdek, Rossiya Prezidenti Vladimir Putin Venesuela xalqiga hamdardlik bildirib, zarur yordam ko‘rsatishga tayyorligini ma’lum qilgan.
