Husanov JCh-2026 ishtirokchilari orasida eng ko‘p daromad topuvchi futbolchilar qatoriga kirdi
Forbes Sport taqdim etgan ro‘yxatda Krishtianu Ronaldu yetakchilik qilmoqda.
O‘zbekiston milliy terma jamoasi va Angliyaning “Manchester Siti” klubi himoyachisi Abduqodir Husanov Jahon chempionati–2026 ishtirokchilari orasidagi eng ko‘p daromad topuvchi futbolchilar reytingidan joy oldi.
Forbes Sport tomonidan e’lon qilingan reytingga ko‘ra, 21 yoshli himoyachi 38-o‘rinni egalladi. U ro‘yxatdan o‘rin olgan yagona o‘zbekistonlik futbolchi bo‘ldi. Ma’lumotlarga ko‘ra, Husanovning bir yillik umumiy daromadi 6,2 million dollarni tashkil etadi. Shundan 5 million dollari klubdagi maoshi va futbol faoliyatidan olinadigan daromad bo‘lsa, qolgan 1,2 million dollar reklama shartnomalari, tijorat loyihalari hamda boshqa tijoriy faoliyatlar hisobiga to‘g‘ri keladi.
Reytingning birinchi pog‘onasidan yillik 280 million dollar daromad bilan Krishtianu Ronaldu joy oldi. Ikkinchi o‘rinni 130 million dollar bilan Lionel Messi egallagan bo‘lsa, kuchli uchlikni 95 million dollar daromadga ega Kilian Mbappe yakunlab bergan.
Husanovning ushbu reytingdan o‘rin olgani uning nafaqat sportdagi, balki tijoriy jihatdan ham jahon futbolida o‘z o‘rnini mustahkamlab borayotganini ko‘rsatadi.
