JCH-2026: Belgiya guruh g‘olibi bo‘ldi, Misr esa pley-off yo‘llanmasini qo‘lga kiritdi
Yangi Zelandiya 1 ochko bilan musobaqani guruh bosqichidayoq yakunladi.
2026 yilgi Jahon chempionatining G guruhida 3-tur uchrashuvlari yakunlandi. So‘nggi tur natijalariga ko‘ra, Belgiya va Misr 1/16 final yo‘llanmasini qo‘lga kiritdi. Eron esa eng yaxshi uchinchi o‘rin egalari safidan joy olish umidini saqlab qoldi.
Guruhning markaziy bahsida Misr va Eron terma jamoalari 1:1 hisobida durang o‘ynadi. Uchrashuvning 5-daqiqasida Mahmud Saber misrliklarni hisobda oldinga olib chiqqan bo‘lsa, oradan ko‘p o‘tmay Ramin Rizoyan muvozanatni tikladi. Ikkinchi bo‘limda har ikki jamoada ham g‘alaba qozonish uchun imkoniyatlar bo‘ldi. Hakam tomonidan qo‘shib berilgan daqiqalarda Shoja Halilzodaning goli ofsayd sabab bekor qilindi va bahs durang bilan yakunlandi.
Parallel uchrashuvda Belgiya Yangi Zelandiyani yirik — 5:1 hisobida mag‘lub etdi. Leandro Trossard dubl qayd etgan bo‘lsa, Kevin de Bryuyne, Romelu Lukaku va Aleksis Salemakers bittadan gol urdi. Yangi Zelandiyaning yagona javob goliga Elijya Jast mualliflik qildi. Natijada Belgiya 5 ochko bilan to‘plar nisbatiga ko‘ra G guruhi g‘olibiga aylandi.
Xuddi shuncha ochko jamg‘argan Misr ikkinchi o‘rinni egallab, pley-off yo‘llanmasini qo‘lga kiritdi. Eron 3 ochko bilan uchinchi pog‘onada qolib, eng yaxshi uchinchi o‘rin egalari qatoridan joy olish imkoniyatini saqlab qoldi. Yangi Zelandiya esa 1 ochko bilan musobaqani guruh bosqichidayoq yakunladi.
