UFC: Nursulton Ro‘ziboyev raqibini ilk raunddayoq taslim etib, UFC’dagi 5-g‘alabasini qo‘lga kiritdi
O‘zbekistonlik MMA jangchisi UFC Fight Night 280 turnirida rossiyalik Andrey Pulyayevni ilk raunddayoq sabmishen usuli bilan mag‘lub etdi.
Ozarbayjon poytaxti Boku shahrida o‘tkazilgan UFC Fight Night 280 turnirida o‘zbekistonlik MMA jangchisi Nursulton Ro‘ziboyev navbatdagi jangini o‘tkazdi. U o‘rta vazn toifasidagi bahsda rossiyalik Andrey Pulyayevga qarshi oktagonga chiqdi.
Uch raundga mo‘ljallangan reyting jangi uzoq davom etmadi. Ro‘ziboyev ilk raundning o‘zidayoq raqibini sabmishen (og‘rituvchi usul) orqali taslim etib, muddatidan oldin g‘alaba qozondi.
Mazkur natija bilan o‘zbekistonlik sportchi professional MMA faoliyatidagi 37-g‘alabasini qo‘lga kiritdi. Uning hisobida, shuningdek, 9 ta mag‘lubiyat va 2 ta durang mavjud.
Bu Ro‘ziboyevning UFC’dagi oltinchi jangi bo‘ldi. Ushbu g‘alabadan so‘ng uning promoushendagi statistikasi 5 g‘alaba va 1 mag‘lubiyatni tashkil etmoqda.
28 yoshli Andrey Pulyayev esa professional faoliyatidagi 5-mag‘lubiyatini qabul qilib oldi. Uning hisobida 10 ta g‘alaba bor.
Eslatib o‘tamiz, Nursulton Ro‘ziboyev avval UFC 319 turnirida amerikalik Brayan Battlga qarshi jang o‘tkazishi kerak edi. Biroq raqib vazn me’yorini bajara olmagani sababli ushbu bahs so‘nggi pallada bekor qilingandi.
Ma’lumot uchun, UFC Fight Night 280 turnirining markaziy jangi Rafael Fiziyev hamda Manuel Torres o‘rtasida bo‘lib o‘tadi.
