Saudiya Arabistonida vertolyot halokatga uchradi, 14 kishi halok bo‘ldi
Vertolyot neft giganti Aramco kompaniyasiga tegishli bo‘lgan. Kompaniya to‘rt oy davom etgan tanaffusdan so‘ng xom neft yuklash ishlarini qayta tiklagan edi.
Saudiya Arabistonining davlat axborot agentligi xabariga ko‘ra, mamlakatning neft giganti Aramco kompaniyasiga tegishli vertolyot 28-iyun kuni mamlakatning sharqiy sohilidagi Ras Tanura hududida halokatga uchradi, deya xabar bermoqda Reuters.
Ma’lum qilinishicha, vertolyot mahalliy vaqt bilan soat 06:00 atrofida qulagan. Hodisa oqibatida 14 nafar Saudiya fuqarosi halok bo‘lgan. Halokat sabablari hozircha noma’lum.
Davlat axborot agentligi tegishli idoralar hodisa yuzasidan to‘liq tergov boshlanganini ma’lum qildi. Aramco esa voqea yuzasidan yuborilgan so‘rovga hozircha javob bermagan.
Qayd etilishicha, Aramco kompaniyasi qariyb to‘rt oy davom etgan tanaffusdan so‘ng juma kuni Fors ko‘rfazidagi Ras Tanura terminalida xom neft yuklash ishlarini qayta tiklagan edi.
Xabarga ko'ra, Saudiya Arabistoni dunyodagi eng yirik neft eksportchilaridan biri hisoblanadi. Mamlakat Yaqin Sharqdagi ishlab chiqaruvchilar qatorida AQSH va Eron o‘rtasidagi urushni to‘xtatishga qaratilgan vaqtinchalik kelishuv fonida neft va gaz ishlab chiqarish hamda eksport hajmini oshirgan.
