Venesueladagi zilzila qurbonlari soni 1 430 nafarga yetdi
Tabiiy ofatdan keyin 68,9 ming nafarga yaqin kishi bedarak yo‘qolgan.
Venesuelada sodir bo‘lgan vayronkor qo‘shaloq zilzila oqibatida halok bo‘lganlar soni 1 430 nafarga yetdi. Mamlakat rasmiylari ma’lumotiga ko‘ra, kamida 68 ming 900 kishi bedarak yo‘qolgan.
Ma’lum qilinishicha, tabiiy ofatdan uch kun o‘tganiga qaramay, qidiruv-qutqaruv ishlari uzluksiz davom etmoqda. Mutaxassislar zilziladan keyingi dastlabki 48–72 soat omon qolganlarni topish uchun eng muhim davr ekanini ta’kidlamoqda.
Venesuela prezidenti vazifasini bajaruvchi Delsi Rodrigesning ma’lum qilishicha, eng ko‘p zarar ko‘rgan La Guayra shtatiga 14 mingdan ortiq harbiy va politsiya xodimi safarbar etilgan. Hududga olib boruvchi barcha avtomobil yo‘llari vaqtincha yopilgan.
Shu bilan birga, mahalliy aholi hukumatning tabiiy ofatga qarshi ko‘rayotgan choralari yetarli emasligini bildirib, ayrim hududlarda fuqarolar yaqinlarini vayronalar ostidan o‘z kuchlari bilan qidirishga majbur bo‘layotganini ta’kidlamoqda.
Ayni paytda Venesuelaga xalqaro yordam hajmi ham ortmoqda. Rasmiy ma’lumotlarga ko‘ra, qutqaruvchilar, maxsus texnikalar va qidiruv itlarini olib kelgan kamida 17 ta xalqaro reys mamlakatga yetib kelgan.
Jumladan, Germaniyaning Texnik yordam xizmati (THW) tarkibidagi 48 nafar mutaxassisdan iborat qutqaruv guruhi ham Karakas shahriga yetib borib, qidiruv-qutqaruv ishlariga qo‘shilgan.
