Fabio Kannavaro terma jamoa bilan Toshkentga qaytmaydi
O'zbekiston MTJ bosh murabbiyi AQShdan Italiyaga uchib ketadi.
O‘zbekiston milliy terma jamoasi bosh murabbiyi Fabio Kannavaro Jahon chempionatidagi ishtirok yakunlangach, jamoa bilan birga Toshkentga qaytmaydi.
Championat.asia xabariga ko‘ra, italiyalik mutaxassis AQSHdan bevosita Italiyaga yo‘l oladi. Bu haqda Kannavaro mundial yakunlanganidan so‘ng ma’lum qilgan.
“Ikki oy davomida terma jamoa bilan birga bo‘ldik, hozir barchamizga biroz hordiq kerak. Nyu-Yorkdan Italiyaga uchib ketaman va siz bilan sentyabr oyida ko‘rishamiz”, — dedi mutaxassis.
Ma’lumot o‘rnida, Fabio Kannavaro boshchiligida O‘zbekiston milliy terma jamoasi o‘z tarixida ilk bor Jahon chempionatida ishtirok etdi. Vakillarimiz guruh bosqichida Kolumbiyaga 1:3, Portugaliyaga 0:5 va Kongo DRga 1:3 hisoblarida mag‘lub bo‘lib, musobaqani pley-off yo‘llanmasisiz yakunladi.
Jahon chempionatidan so‘ng jamoaning Toshkentga qaytishi ortidan bosh murabbiy ishtirokida matbuot anjumani o‘tkazilishi kutilayotgan edi. Biroq Kannavaroning Italiyaga jo‘nab ketishi fonida uning jurnalistlar bilan uchrashuvi sentyabr oyiga qoldirilishi mumkin.
