Fransiyada samolyot qulashi oqibatida 11 kishi halok bo'ldi
Parashyutchilarni olib ketayotgan samolyot bortidagi talabalar, instruktorlar va uchuvchi voqea joyida vafot etgan.
Fransiyaning sharqida joylashgan Tomblen shahrida parashyutchilarni olib ketayotgan yengil fuqarolik samolyoti halokatga uchrashi oqibatida 11 kishi halok bo‘ldi. Bu haqda BBC xabar berdi.
Ma’lumotlarga ko‘ra, halokat oqibatida samolyot uchuvchisi hamda bortdagi 10 nafar yo‘lovchi — besh nafar talaba va besh nafar instruktor voqea joyida hayotdan ko‘z yumgan.
Dastlabki ma’lumotlarga ko‘ra, parashyut maktabiga tegishli samolyot Nensi-Essaye aerodromidan parvoz qilgan va ko‘p o‘tmay Tomblen shahridagi savdo markazi yaqiniga qulagan.
Merte-et-Mozel departamenti prefekti Iv Seguyning ma’lum qilishicha, samolyot deyarli tik holatda aerodrom chetidagi hududga qulagan. Hodisa turar joylarga juda yaqin joyda sodir bo‘lgan bo‘lsa-da, yerda qo‘shimcha qurbonlar qayd etilmagan.
Voqea joyiga 50 nafar o‘t o‘chiruvchi, 25 ta maxsus texnika, politsiya va fuqarolik muhofazasi xodimlari safarbar etilgan. Hozirda aviahalokat sabablari yuzasidan sud-texnik ekspertiza va tergov ishlari olib borilmoqda.
Fransiya transport vaziri ushbu hodisani “dahshatli fojia” deb baholagan.
