Germaniyada vasiylik mojarosi sabab otishma yuz berdi

 

Germaniya shimolidagi Stade shahrida joylashgan yoshlar va oilalarni ijtimoiy qo‘llab-quvvatlash markazida yuz bergan qurolli hujum oqibatida 6 kishi halok bo‘ldi. Fojiaga oilaviy kelishmovchilik hamda farzand vasiyligi bilan bog‘liq mojaro sabab bo‘lgan. Bu haqda CNN xabar berdi.

 

Dastlabki ma’lumotlarga ko‘ra, otishma oqibatida besh kishi voqea joyida halok bo‘lgan, yana bir kishi esa shifoxonada olgan og‘ir tan jarohatlari bilan vafot etgan. Qurbonlarning to‘rt nafari ayol, ikki nafari erkak bo‘lib, ularning barchasi muassasa xodimlari bo‘lgan. Hodisa oqibatida yana bir necha kishi turli darajada jarohat olgan.

 

Huquq-tartibot idoralari ma’lum qilishicha, jinoyatda gumonlanayotgan shaxs Germaniyada tug‘ilgan, asli turkiyalik bo‘lgan 45 yoshli erkakdir. U voqea sodir bo‘lgan kuni qizi ustidan vasiylik masalasini muhokama qilish uchun markazga rasmiy uchrashuvga kelgan.

 

Ma’lum bo‘lishicha, gumondorning uch oylik qizi va 34 yoshli turmush o‘rtog‘i ham otishma vaqtida binoda bo‘lgan, biroq ularga shikast yetmagan. Chaqaloq zudlik bilan ijtimoiy xizmatlar himoyasiga olingan, bolaning onasi esa politsiya tomonidan so‘roq qilinmoqda.

 

Germaniya Quyi Saksoniya ichki ishlar vaziri Daniela Berens ushbu hodisani "oldindan rejalashtirilgan va o‘ta sovuqqonlik bilan sodir etilgan jinoyat" deya baholadi.

 

Shuningdek, voqea joyidan qochishga uringan 65 yoshli avtomobil haydovchisi ham hodisaga aloqadorlikda gumonlanib qo‘lga olingan.

 

Germaniya Prezidenti Frank-Valter Shtaynmayer hamda kansler Fridrix Merts halok bo‘lganlarning oila a’zolariga chuqur hamdardlik bildirdi.