Tramp benzin narxlarini pasaytirishni talab qilib, sotuvchilarga tahdid qildi
AQSh prezidenti narxlarni sun’iy oshirish noqonuniy ekanini ta’kidlab, bunga amal qilinmasa, "katta muammolar" yuzaga kelishini aytdi.
AQSH prezidenti Donald Tramp benzin chakana sotuvchilarini yoqilg‘i narxlarini zudlik bilan pasaytirishga chaqirdi. Bu haqda u Truth Social ijtimoiy tarmog‘idagi sahifasida ma’lum qildi, deya xabar berdi Reuters.
"Narxlarni sun’iy oshirishga yo‘l qo‘yilmaydi, bu mutlaqo noqonuniy. Agar chakana sotuvchilar buni qilmasa, oldinda katta muammolar kutmoqda. Bir gallon benzin narxini taxminan 2,50 dollar darajasiga tushirishni maqsad qiling", — deb yozdi Tramp.
O‘tgan hafta AQSH prezidenti Adliya vazirligiga neft kompaniyalari xom neft narxlari pasayganiga qaramay, benzin narxlarini tushirmayotganini tekshirishni topshirganini bildirgan edi. Uning fikricha, ayrim kompaniyalar iste’molchilardan sun’iy ravishda ortiqcha haq undirmoqda.
Joriy yilda AQSH va Isroilning Eronga bergan zarbalari hamda bunga javoban Eronning Isroil va AQSH harbiy bazalari joylashgan Fors ko‘rfazi davlatlariga uyushtirgan hujumlari fonida jahon neft narxlari keskin oshgan.
So‘nggi haftalarda esa Vashington va Tehron o‘rtasidagi diplomatik muloqotlar fonida AQSHda benzin narxlarida ma’lum darajada pasayish kuzatilmoqda.
Benzin narxlari masalasi noyabr oyida bo‘lib o‘tadigan oraliq saylovlar arafasida AQSHdagi muhim siyosiy va iqtisodiy mavzulardan biri bo‘lib qolmoqda.
