O‘rozovga Bundesliganing yetakchi jamoasi qiziqish bildirmoqda — OAV
Futbolchi “Borussiya Myonxengladbax”ning yozgi transferlar uchun shakllantirilgan kuzatuv ro‘yxatidan joy olgan.
O‘zbekiston milliy terma jamoasi himoyachisi Jahongir O‘rozov faoliyatini Germaniya Bundesligasida davom ettirishi mumkin.
Germaniyaning Kicker nashri yozishicha, 22 yoshli futbolchi “Borussiya Myonxengladbax”ning yozgi transferlar uchun shakllantirilgan kuzatuv ro‘yxatidan joy olgan.
Manbaga ko‘ra, Myonxengladbax klubi yangi mavsum oldidan markaziy himoya chizig‘ini kuchaytirishni rejalashtirmoqda. Shu sabab seleksiya bo‘limi bir qator yosh himoyachilarni kuzatmoqda va O‘rozov ham ana shunday nomzodlardan biri sifatida ko‘rilmoqda.
Jahongir O‘rozov ayni paytda Samarqandning “Dinamo” klubida to‘p suradi. Uning samarqandliklar bilan amaldagi shartnomasi 2027 yil yakuniga qadar mo‘ljallangan. Himoyachi yaqinda O‘zbekiston milliy terma jamoasi safida tarixiy JCH–2026 musobaqasida ishtirok etdi.
U Kolumbiyaga qarshi bahsda zaxiradan maydonga tushgan bo‘lsa, Kongo DRga qarshi uchrashuvni asosiy tarkibda boshlab, 82 daqiqa harakat qildi.
Hozircha “Borussiya Myonxengladbax” tomonidan rasmiy taklif yoki muzokaralar boshlanganiga doir ma’lumot yo‘q. Biroq Kicker ma’lumotiga ko‘ra, Bundesliga vakili o‘zbekistonlik himoyachining transferi imkoniyatlarini o‘rganishda davom etmoqda.
