Venesueladagi zilziladan olti kun o‘tib, 3 yoshli bola vayronalar ostidan tirik qutqarildi
Bolani Iordaniyadan kelgan qutqaruvchilar vayronalar ostidan olib chiqqan, hozirda 3 yoshli Kliber Moran shifoxonada davolanmoqda.
Venesuelada o‘tgan hafta yuz bergan vayronkor ikki zilziladan keyin olib borilgan qidiruv-qutqaruv ishlari davomida erta tongda bir bola vayronalar ostidan tirik olib chiqildi. Bu haqda Reuters agentligi xabar berdi.
Prezident vazifasini bajaruvchi Delsi Rodrigesning Telegram’da ma’lum qilishicha, Kliber Moran ismli bola La Guayra shtatidagi Los Korales Garden 1 turar joy majmuasi vayronalari ostida olti kun qolganidan so‘ng Iordaniyadan kelgan qutqaruvchilar tomonidan qutqarilgan.
Rasmiy ma’lumotlarga ko‘ra, Venesuelada o‘tgan chorshanba kuni bir daqiqadan kam vaqt oralig‘ida magnitudasi 7,2 va 7,5 bo‘lgan ikkita zilzila sodir bo‘lgan. Tabiiy ofat oqibatida ko‘plab binolar qulab, minglab odamlar vayronalar ostida qolgan.
Delsi Rodriges bolani 3 yoshli deb atagan bo‘lsa, Milliy assambleya prezidenti Xorxe Rodriges uning 2 yoshda ekanini bildirgan. Bola qutqarilgach, tibbiy muassasaga olib borilgan.
“Vayronalar ostidan yana tirik odamlarni topish umidini yo‘qotmasligimiz kerak. Bugun erta tongda 2 yoshli bola qutqarildi va hozir Karakasdagi tibbiyot markazida davolanmoqda”, — dedi Xorxe Rodriges televideniye orqali qilgan murojaatida.
Shuningdek, BMT matbuot kotibi Stefan Dyujarrikning ma’lum qilishicha, seshanba kuni UNICEF tomonidan yuborilgan 47 tonna gumanitar yordam Venesuelaga yetib kelgan.
Yuk tarkibiga shoshilinch tibbiy yordam to‘plamlari, xavfsiz tug‘ruq, yangi tug‘ilgan chaqaloqlar parvarishi, kasalliklarning oldini olish va davolash uchun zarur vositalar kiritilgan.
