Venesueladagi zilzila qurbonlari soni 2 300 nafarga yaqinlashdi
Hukumat zilzila qurbonlari xotirasiga 7 kunlik milliy motam e’lon qildi.
Venesuelada kuchli zilzilalar oqibatida halok bo‘lganlar soni 2 295 nafarga yetdi. Bu haqda mamlakat Milliy Assambleyasi raisi Xorxe Rodriges ma’lum qildi.
So‘nggi rasmiy ma’lumotlarga ko‘ra, tabiiy ofat oqibatida yana 11 mingdan ortiq kishi jarohatlangan, 12 800 nafar fuqaro esa vaqtinchalik boshpanalarga joylashtirilgan.
Qayd etilishicha, 24-iyun kuni Venesuelada ketma-ket 7,2 va 7,5 magnitudali ikkita kuchli zilzila sodir bo‘lgan. Shundan buyon 782 ta aftershok qayd etilgan bo‘lib, ularning intensivligi asta-sekin pasayib bormoqda.
Eng katta talafot La Guaira shahrida kuzatilgan. Dastlabki ma’lumotlarga ko‘ra, hududda kamida 100 ta bino to‘liq vayron bo‘lgan. Shuningdek, Karakas, Miranda, Aragua, Karabobo, Lara va Yarakuy shtatlarida ham jiddiy zarar qayd etilgan.
Milliy Assambleya raisining ta’kidlashicha, qidiruv-qutqaruv ishlari uzluksiz davom etmoqda. Biroq vayronalar ostidan tirik qolganlarni topish ehtimoli tobora kamayib bormoqda.
Tabiiy ofat qurbonlari xotirasiga Venesuela hukumati 1-iyuldan boshlab yetti kunlik milliy motam e’lon qildi.
