Damashqda Adliya saroyi yaqinidagi portlash oqibatida 10 kishi halok bo‘ldi
Ayrim fuqarolar portlashga sobiq Prezident Bashar Asadning tarafdorlari aloqador ekanini aytmoqda.
Suriya poytaxti Damashqdagi kafeda sodir bo‘lgan portlash oqibatida halok bo‘lganlar soni 10 nafarga yetdi. Bu haqda AP xabar berdi.
Portlash poytaxtdagi asosiy sud majmuasi yaqinida joylashgan, asosan advokatlar tashrif buyuradigan kafeda sodir bo‘lgan. Suriya Sog‘liqni saqlash vazirligi ma’lumotiga ko‘ra, hodisa oqibatida yana 21 kishi jarohat olgan.
Rasmiylar tergov davom etayotganini bildirgan. Hujumni kim amalga oshirgani rasman aniqlanmagan. Shunga qaramay, dafn marosimida ishtirok etgan ayrim fuqarolar aybni 2024-yil dekabr oyida hokimiyatdan ag‘darilgan sobiq prezident Bashar Asad tarafdorlariga yukladi. Marosim davomida sobiq rejim tarafdorlarini jazolashni talab qiluvchi shiorlar ham yangradi.
Shu kuni Damashq chekkasidagi Jaramana tumanidagi nazorat-o‘tkazish punktiga ham hujum uyushtirildi. Suriyaning davlat axborot agentligi SANA xabariga ko‘ra, qo‘l granatalari bilan amalga oshirilgan hujum oqibatida uch nafar xavfsizlik xodimi yaralangan, hujumchi halok bo‘lgan va yana bir gumonlanuvchi qo‘lga olingan.
