Tailandda dahshatli YTH: 11 yoshli bola rohiblar guruhini urib yubordi
Bola 34 nafar rohiblar ketayotgan guruhni urib yuborgan, halok bo‘lganlar soni 10 nafarga yetdi.
Tailandning Mukdahan viloyatida 11 yoshli bola ota-onasiga tegishli pikapni ruxsatsiz boshqarib chiqib, yo‘l bo‘ylab ketayotgan buddist rohiblar guruhini urib yubordi. Hodisa oqibatida 10 nafar rohib halok bo‘ldi, yana bir necha kishi og‘ir tan jarohatlari oldi. Bu haqda AmarinTV xabar berdi.
Ma’lumotlarga ko‘ra, bola oilasiga tegishli Isuzu rusumli pikapni olib chiqib, Mukdahan shahridan Ubon Ratchathani tomonga yo‘l olgan. Shu vaqtda u 34 nafar buddist rohibdan iborat guruhni urib yuborgan. Hodisa vaqtida yaqin atrofda bo‘lgan yana bir fuqaro ham jarohatlangan.
Voqea joyida besh nafar rohib halok bo‘lgan. Og‘ir ahvolda shifoxonaga yetkazilgan yana besh nafar jabrlanuvchining hayotini saqlab qolishning imkoni bo‘lmagan. Qolgan jabrlanganlarning ayrimlari shifoxonada davolanmoqda.
Hodisa yuzasidan Tailand transport vazirining o‘rinbosari voqea joyiga yetib borgan. Dastlabki ma’lumotlarga ko‘ra, fojia sodir bo‘lgan yo‘l avval ham ko‘plab yo‘l-transport hodisalari qayd etilgan xavfli hududlardan biri hisoblanadi.
Voqeadan so‘ng 11 yoshli bola politsiya bo‘limiga olib borilgan. Uning buvisi jurnalistlarga bolaning avtomobilni olib chiqishiga to‘sqinlik qilishga uringanini, biroq bunga ulgurmaganini ma’lum qilgan. Bobosining aytishicha, u nevarasiga hech qachon avtomobil boshqarishni o‘rgatmagan.
