Venesueladagi zilzila qurbonlari soni 2595 kishiga yetdi
Zilziladan buyon vayronalar ostidan 6462 kishi tirik qutqarilgan.
Venesuelada 24-iyun kuni sodir bo‘lgan kuchli zilzilalar oqibatida halok bo‘lganlar soni 2595 nafarga yetdi. Bu haqda mamlakatning vaqtinchalik prezidenti Delsi Rodriges ma’lum qildi.
Karakasdagi La Karlota aviabazasida o‘tkazilgan matbuot anjumanida ta’kidlanishicha, 7,2 va 7,5 magnitudali ikki kuchli zilzila oqibatida 12 400 kishi turli darajada jarohat olgan. Qidiruv-qutqaruv ishlariga 33 davlatdan kelgan mutaxassislar jalb etilgan.
Rodrigesning bildirishicha, tabiiy ofat sodir bo‘lganidan buyon vayronalar ostidan 6462 kishi tirik holda qutqarib olingan.
Uning so‘zlariga ko‘ra, zilziladan so‘ng mamlakatdagi barcha favqulodda xizmatlar zudlik bilan safarbar etilgan, fuqarolik mudofaasi tizimi hamda davlatning favqulodda vaziyatlarga javob berish mexanizmlari darhol ishga tushirilgan.
Shuningdek, Delsi Rodriges hukumat ofatga kech javob bergani haqidagi da’volarni rad etib, asosiy maqsad insonlar hayotini saqlab qolish ekanini ta’kidladi. U qidiruv-qutqaruv ishlarida siyosiy omillar emas, insonparvarlik tamoyillari ustuvor bo‘layotganini qayd etgan.
Rasmiy ma’lumotlarga ko‘ra, zilzilalar oqibatida uy-joyini tark etishga majbur bo‘lganlar soni 12 841 nafarga yetgan. Hukumat yil yakuniga qadar boshpanasiz qolgan barcha fuqarolarni yangi uy-joy bilan ta’minlashni rejalashtirmoqda.
