Toshkentda yangi tipdagi maktablar quriladi: o‘quvchi sig‘imi ikki baravar oshiriladi
Sergelidagi ayrim maktablar quvvatidan ikki baravar yuqori yuklamada ishlamoqda. Muammoni hal etish uchun yangi maktablarda sport zali va oshxona yerto‘laga joylashtiriladi.
Prezident Shavkat Mirziyoyev ishtirokidagi yig‘ilishda Toshkent shahrining Sergeli tumanidagi ayrim maktablar o‘z quvvatiga nisbatan 1,5–2 baravar ko‘p o‘quvchiga xizmat qilayotgani qayd etildi. Muammoni hal etish maqsadida o‘quvchi sig‘imini ikki baravar oshirish imkonini beradigan yangi tipdagi maktablar qurish loyihasi taklif qilindi.
Loyihaga ko‘ra, maktablarning sport zali, oshxona va ustaxonalari yerto‘la qismida joylashtiriladi, yuqori qavatlar esa to‘liq sinf xonalari sifatida foydalaniladi. Joriy yilda Toshkent shahrining har bir tumanida bittadan maktab va bittadan bog‘chada ushbu yondashuv sinov tariqasida joriy etilib, “poytaxt tajribasi” yaratiladi.
Shuningdek, poytaxtda aholi va sayyohlar uchun qulay mikroiqlim yaratish maqsadida 12 ta sun’iy ko‘l barpo etish ishlari boshlanishi ma’lum qilindi. Ularning uchtasi Sergeli tumanidagi Qo‘shqo‘rg‘on, Sultonobod va Farog‘atli mahallalarida jami 22 gektar maydonda tashkil etiladi.
Mazkur ko‘llar poytaxt iqlimini mo‘tadillashtirish, shuningdek, fuqarolar uchun sayr va dam olish maskanlarini yaratishga xizmat qilishi ko‘zda tutilgan.
Bundan tashqari, “Jo‘n” kanalining Sergeli va Yangihayot tumanlari hududidan o‘tuvchi 5 kilometrlik qismini betonlashtirish ishlari boshlangan. Tuman hokimlariga yil yakuniga qadar kanal bo‘yida sayilgoh hamda salomatlik yo‘laklarini barpo etish vazifasi yuklatildi.
Shuningdek, Chirchiq daryosining Toshkent shahri hududidan o‘tuvchi 16 kilometrlik qismida o‘zanni mustahkamlash ishlari boshlanadi. Loyiha doirasida qo‘shimcha 300 gektar maydonda “yashil belbog‘”, sayilgohlar, piyodalar va velosiped yo‘laklari barpo etilishi rejalashtirilgan.
