JCH—2026:Angliya 10 kishi bo‘lib ham Meksikani mag‘lub etdi
Chorak finalda Angliya Braziliyani musobaqadan chiqarib yuborgan Norvegiya bilan kuch sinashadi.
2026-yilgi FIFA Jahon chempionatining 1/8 finalida Angliya terma jamoasi Meksikani 3:2 hisobida mag‘lub etib, chorak final yo‘llanmasini qo‘lga kiritdi.
Mexiko shahridagi "Asteka" stadionida bo‘lib o‘tgan uchrashuvda hisobni 36-daqiqada Jud Bellingham ochdi. Oradan ikki daqiqa o‘tib u dublni rasmiylashtirib, Angliyaning ustunligini ikki to‘pga yetkazdi.
42-daqiqada meksikalik Xulian Kinyones hisobdagi farqni qisqartirdi. Ikkinchi bo‘lim boshida, 54-daqiqada angliyalik himoyachi Jarrell Kuansa qizil kartochka olib maydonni tark etdi va jamoasi o‘yinning qolgan qismini bir kishi kam bo‘lib davom ettirdi.
Shunga qaramay, 60-daqiqada Harri Keyn penaltidan gol urib, hisobni 3:1 ko‘rinishiga olib keldi. Bu gol hujumchining turnirdagi oltinchi goli bo‘ldi. 69-daqiqada Raul Ximenes ham penaltidan aniq zarba yo‘llab, Meksikaning ikkinchi golini urdi. Biroq uchrashuv yakuniga qadar mezbonlar hisobni tenglashtira olmadi.
Mazkur g‘alabadan so‘ng Angliya chorak finalga yo‘l oldi. Endi inglizlar yarim final yo‘llanmasi uchun Braziliyani musobaqadan chiqarib yuborgan Norvegiya terma jamoasiga qarshi maydonga tushadi.
