O‘zbekistonda “E-bozor” yagona raqamli bozor platformasi joriy etiladi
Platformada bo‘sh savdo o‘rinlari haqidagi ma'lumotlar e'lon qilinib, bir qator xizmatlar onlayn ko‘rsatiladi.
O‘zbekistonda bozorlar va savdo komplekslari faoliyatini raqamlashtirish maqsadida “E-bozor” yagona raqamli bozor platformasi bosqichma-bosqich ishga tushiriladi. Bu Hukumatning “Bozorlar va savdo komplekslarida raqamlashtirish ishlarini samarali tashkil etish hamda maishiy korrupsiyaning oldini olishga doir chora-tadbirlar to‘g‘risida”gi qarorida belgilandi.
Qarorga ko‘ra, “E-bozor” platformasi 2026-yil 1-oktyabrgacha sinov tariqasida, 2027-yil 1-martgacha esa to‘liq amaliyotga joriy etiladi.
Platforma orqali bozorlar va savdo komplekslarining pasporti, manzili, bo‘sh savdo shoxobchalari hamda savdo o‘rinlari haqidagi ma’lumotlar ochiq e’lon qilib boriladi. Shuningdek, fuqarolar bozorlar faoliyatiga oid ma’lumotlar bilan tanishishi, bozor ma’muriyatiga elektron murojaat yuborishi va unga javob olishi mumkin bo‘ladi.
“E-bozor” platformasi “Soliq” axborot tizimlari kompleksi tarkibida joriy etiladi. Shuningdek, har bir bozor va savdo kompleksiga soliq organlari xodimlari biriktirilib, ularning faoliyati samaradorligi har kuni tahlil qilinadi.
Qarorga muvofiq, bozorlar hududi va ularga tutash avtoturargohlarda to‘lovlarni yagona QR-kod orqali amalga oshirish imkoniyati yaratiladi.
Bundan tashqari, 2026-yil 1-avgustdan boshlab transport vositalarini jarima maydonchalaridan chiqarish uchun ruxsatnoma faqat ma’muriy ishni ko‘rib chiquvchi organ va ijro organi tomonidan “Jarima maydonchasi” axborot tizimi orqali QR-kod bilan tasdiqlanib, elektron shaklda yuboriladi.
