Venesueladagi zilzilalar qurbonlari soni 3 500 nafardan oshdi
Tabiiy ofat oqibatida 16 740 kishi jarohatlandi, qariyb 18 ming kishi boshpanasiz qoldi.
Venesuelada iyun oyi oxirida sodir bo‘lgan ikki kuchli zilzila oqibatida halok bo‘lganlar soni 3 535 nafarga yetdi. Bu haqda mamlakat parlamenti raisi Xorxe Rodriges ma’lum qildi.
Uning so‘zlariga ko‘ra, tabiiy ofat oqibatida 16 740 kishi jarohatlangan, 18 mingga yaqin fuqaro boshpanasiz qolgan. Hozirda qidiruv-qutqaruv ishlari davom etmoqda va qurbonlar soni yana ortishi mumkin.
BMTning dastlabki baholariga ko‘ra, bedarak yo‘qolganlar soni 50 ming nafargacha yetishi ehtimoldan xoli emas. Venesuela hukumati hozircha bedarak yo‘qolganlar bo‘yicha rasmiy statistikani e’lon qilmagan.
Eslatib o‘tamiz, 24-iyun kuni mamlakat shimolida, poytaxt Karakas yaqinida oradan atigi 39 soniya o‘tib, magnitudasi 7,2 va 7,5 bo‘lgan ketma-ket ikki zilzila sodir bo‘ldi. Mutaxassislar ushbu hodisani Venesuelada so‘nggi 125 yil ichidagi eng kuchli seysmik ofatlardan biri sifatida baholamoqda.
Tabiiy ofatdan eng ko‘p La Guayra shtati zarar ko‘rdi. Zilzilalardan keyin yuzlab aftershoklar qayd etilgan. Rasmiy ma’lumotlarga ko‘ra, 60 mingga yaqin bino vayron bo‘lgan yoki jiddiy shikastlangan.
Hukumat mamlakatda favqulodda holat va motam e’lon qilgan. Jabrlanganlarni joylashtirish maqsadida Karakas va La Guayra hududlarida 80 ta vaqtinchalik boshpana tashkil etilib, ularda 12 mingdan ortiq fuqaro joylashtirilgan.
