Eron AQShni o‘zaro anglashuv memorandumini buzganlikda aybladi
AQShning so‘nggi harbiy amaliyotlari harbiy harakatlarni to‘xtatish bo‘yicha erishilgan kelishuvga zid hisoblanadi.
Eron Tashqi ishlar vazirligi AQShni Eron hududiga uyushtirilgan navbatdagi harbiy hujumlar orqali urushni tugatish bo‘yicha tuzilgan bitimni buzganlikda aybladi.
Vazirlik bayonotida qayd etilishicha, AQSh harbiylari Eron janubidagi bir nechta kuzatuv markazlariga zarba bergan. Tehron bu harakatni BMT Nizomining 2-moddasi 4-bandiga hamda harbiy harakatlarni to‘xtatishni nazarda tutuvchi bitimning birinchi bandiga zid deb baholagan.
Eron TIV, shuningdek, AQSh tomonidan Eron neftini eksport qilishga oid ruxsatlarning bekor qilinishi, Hormuz bo‘g‘ozidagi manfaatlarga putur yetkazilishi va Isroilning Livandagi harbiy amaliyotlari urushni tugatish bo‘yicha erishilgan kelishuvning asosiy shartlarini izdan chiqarganini ta’kidlagan.
Rasmiy Tehron mintaqadagi vaziyatning keskinlashuvi oqibatlari uchun AQShni javobgar deb hisoblashini ma’lum qilgan.
Bayonotda Fors ko‘rfazi davlatlari va boshqa mamlakatlar xalqaro huquq normalariga rioya qilishi, ularning hududi va infratuzilmasidan Eronga qarshi harbiy harakatlar uchun foydalanilishiga yo‘l qo‘ymasligi lozimligi qayd etilgan.
Eron Tashqi ishlar vazirligi AQShning harbiy harakatlarini keskin qoralab, BMT Xavfsizlik Kengashi hamda BMT Bosh kotibini mintaqaviy va xalqaro xavfsizlikni ta’minlash bo‘yicha o‘z mas’uliyatini bajarishga chaqirdi.
Shuningdek, bayonotda Eron Qurolli kuchlari BMT Nizomining 51-moddasiga muvofiq mamlakatning hududiy yaxlitligi, suvereniteti va milliy xavfsizligini himoya qilish uchun zarur choralarni ko‘rishi ta’kidlangan.
