O‘zbekistonda iyulning ikkinchi yarmida havo harorati odatdagidan yuqori bo‘lishi mumkin
Harorat ayrim hududlarda 45 darajagacha yetishi mumkin.
O‘zbekiston yilning eng issiq davriga kirib bormoqda. Iyul oyining ikkinchi yarmida havo harorati iqlimiy me’yordan yuqori bo‘ladi, ayrim hududlarda esa 45 darajagacha yetishi mumkin. Bu haqda Ekologiya va iqlim o‘zgarishi milliy qo‘mitasi xabar berdi.
Ma’lum qilinishicha, iyul an’anaviy ravishda respublikadagi eng issiq oy hisoblanadi. O‘rtacha kunduzgi havo harorati 35–37 darajani, janubiy va cho‘l hududlarida esa 38–40 darajani tashkil etadi. Kuchli issiq to‘lqinlari kuzatiladigan davrlarda harorat 40–42 darajagacha, ayrim joylarda esa 43–45 darajagacha ko‘tarilishi mumkin.
Qayd etilishicha, so‘nggi yillarda mamlakatda o‘ta issiq kunlar soni ortib bormoqda. O‘tgan o‘n yillikdagi barcha iyul oylari iqlimiy me’yordan issiqroq bo‘lgan, ularning to‘qqiztasi esa meteorologik kuzatuvlar tarixidagi eng issiq o‘nta iyul qatoridan joy olgan.
Prognozlarga ko‘ra, iyulning birinchi o‘n kunligi oxiriga kelib kunduzgi havo harorati 37–40 darajagacha, janubiy hududlarda esa 41–43 darajagacha ko‘tariladi. Oy oxirigacha harorat 33–38 darajadan 38–43 darajagacha o‘zgarib turadi, shimoliy, cho‘l va janubiy hududlarning ayrim joylarida esa 45 darajagacha yetishi mumkin.
Shuningdek, iyul oyining o‘rtacha harorati iqlimiy me’yordan 1,5–3 darajaga yuqori bo‘lishi kutilmoqda. Oy asosan quruq ob-havo bilan o‘tadi, yog‘ingarchilik me’yordan kam bo‘ladi. Faqat ayrim tog‘oldi va tog‘li hududlarda qisqa muddatli yomg‘ir hamda momaqaldiroq kuzatilishi mumkin.
Mutaxassislar aholini uzoq vaqt quyosh ostida qolmaslikka, yetarli miqdorda suyuqlik iste’mol qilishga hamda bolalar, keksalar va surunkali kasalligi bor fuqarolar salomatligiga alohida e’tibor qaratishga chaqirmoqda.
