Germaniyada jazirama fonida o‘lim holatlari keskin oshdi
Iyun oxiridagi jazirama davrida o‘lim holatlari so‘nggi uch yillik o‘rtacha ko‘rsatkichdan 5,6 ming nafarga oshgan.
Germaniyada iyun oyining oxirida kuzatilgan kuchli issiq havo to‘lqini fonida o‘lim holatlari sezilarli darajada oshgani qayd etildi. Bu haqda mamlakat Federal statistika boshqarmasining dastlabki ma’lumotlariga tayanib, Spiegel nashri xabar berdi.
Ma’lumotlarga ko‘ra, 22–28-iyun kunlari mamlakat bo‘ylab 23 655 nafar fuqaro vafot etgan. Bu ko‘rsatkich so‘nggi uch yilning ayni davridagi o‘rtacha ko‘rsatkichdan 5 655 taga ko‘p.
Shu bilan birga, mutaxassislar o‘lim holatlarining barchasini bevosita jazirama bilan bog‘lashga shoshilmaslik kerakligini ta’kidlamoqda.
Kyoln shoshilinch tibbiy yordam xizmati tibbiy direktori Aleksandr Lexleytnerning qayd etishicha, yuqori harorat o‘lim ko‘rsatkichlariga ta’sir qilgani ehtimoldan xoli emas, biroq uning aniq ulushini belgilash murakkab.
“Yuqori haroratning ta’siri borligiga shubha yo‘q. Ammo bu ta’sirning qanchalik katta ekanini aniqlash ko‘pincha mushkul”, — degan u.
Mutaxassisning so‘zlariga ko‘ra, ayniqsa yoshi katta yoki surunkali kasalliklarga chalingan bemorlar vafot etgan holatlarda issiq havo bilan to‘g‘ridan-to‘g‘ri sabab-oqibat bog‘liqligini aniqlash qiyin hisoblanadi.
